ISITOBHA seKaizer Chiefs, u-Inacio Miguel, ngomunye wabadlali abashaye amagoli ngesikhathi benqoba iStellenbosch FC ngo 3-1 kuma-quarterfinal eNedbank Cup
Image: BACKPAGEPIX
Stellenbosch FC (0) 1
Kaizer Chiefs (1) 3
IKAIZER Chiefs iphinde yadedela isibhaxu kwiStellenbosch FC, iyithela phansi ngo 3-1 kwi-quarterfinal yeNedbank Cup eNelson Mandela Bay Stadium, eGqeberha ngoMgqibelo ebusuku.
Amakhosi abesevele eyinqobe kabili iStellies emidlalweni yeligi kule sizini, njengoba eseyiphinde kowomkhumulajezi.
U-Inacio Miguel ubeke iChiefs phambili maphakathi nesiwombe sokuqala, u-Andre de Jong wabuyisa iStellies ngasekupheleni kwesesibili.
Iqembu likaNasreddine Nabi libe selithola amagoli amabili ashaywe nguPule Mmodi noMfundo Vilakazi esikhathini esengezwe ngunompempe, lazibekisela indawo kowandulela owamanqamu.
Amakhosi athole iphenathi ngesikhathi isitobha seStellies, u-Ismael Toure, sibamba ibhola ngesandla ebhokisini, uMiguel wayibeka enethini ngomzuzu ka-20.
Iqembu lika Steve Barker lithole ithuba lokulinganisa ngomzuzu ka-27 ngesikhathi uChumani Butsaka ethola ibhola engamakiwe ngaphandle kancane kwebhokisi, kodwa wakha amabhilidi.
Womabili amaqembu athole amathuba sekuzoyiwa ekhefini. U-Ashley du Preez ujike uThabo Moloisane ngakwesokudla maqedane waliqondisa ngqo kunozinti, uSage Stephens, ibhola.
Injini yeStellies, uSihle Nduli, izame inhlanhla ikude, ibhola ladlula eceleni kwepali, kwayiwa ekhefini eziNabi zisahamba phambili ngo 1-0.
UNduli uphinde wazama ngekhanda ngomzuzu ka-65, wamthola elilindile ibhola unozinti weChiefs, uBruce Bvuma.
Unozinti waMakhosi obesebhentshini, uBrandon Peterson, ukhishwe ngekhadi elibomvu ngomzuzu ka-77, esolwa ngokusho okuthile okungamukelekile komunye wabasizi bakanompempe.
IStellies igcine ilitholile igoli lokulinganisa ngomzuzu ka-86. Ikhona kaSanele Barns ithole uDe Jong, wayibeka phakathi ngekhanda.
Nokho, iChiefs iphinde yahamba phambili ngesikhathi esengezwe ngunompempe. UStephens uhlulekile ukubamba ibhola eliqhamuke kwikhona, uMmodi walibeka phakathi ngedolo.
Umsizi kanompempe uqale waphakamisa iduku, kodwa unompempe uSikhumbuzo Gasa wathatha isinqumo sokuthi alibalwe igoli ngemuva kokuxoxisana naye.
IStellies ithole ikhona umdlalo usuyophela, unozinti wayo waya phambili eyolekelela. Izinto azimhambelanga kahle njengoba iChiefs ikwazile ukukhipha ibhola, latholwa uVilakazi, ogijime yedwa waze wayolibeka enethini.
Related Topics: